Starf doktorsnema í tölfræði er laust til umsóknar við Raunvísindadeild Háskóla Íslands. Doktorsneminn mun vinna að þróun tölfræðilíkana fyrir hámarksúrkomu. Starfið er styrkt til þriggja ára af Rannsóknamiðstöð Íslands með verkefnisstyrk úr Rannsóknasjóði.

Verkefnið felst í þróun tölfræðiaðferða sem nýta sem best tiltæk gögn til að spá fyrir um aftaka úrkomu með minna en 24 klst. varanda í breyttu loftslagi framtíðar, og gera spár um aftaka úrkomu aðgengilegar fyrir notendur. Tölfræðilíkan til að meta varandaferla verður sett fram. Líkanið tekur tillit til samdreifni á milli hágilda með mismunandi varanda og samdreifni í rúmi. Verkefnið mun gefa af sér framtíðarspár um aftaka úrkomu sem tekur mið af breytingum á loftslagi samkvæmt viðurkenndum sviðsmyndum loftslagsbreytinga.

• MS gráða í tölfræði, gagnavísindum (e. data science), hagnýttri stærðfræði eða skyldum greinum

• Reynsla af greiningu á veðurfarsgögnum er kostur

• Góð forritunarkunnátta

• Góð enskukunnátta, bæði í ræðu og riti

• Góðir samstarfs- og samskiptahæfileikar

Ráðning í starfið er háð því að umsækjandi sæki formlega um að hefja doktorsnám við Háskóla Íslands í viðeigandi deild og að umsóknin sé samþykkt af deildinni.

Laun samkvæmt gildandi kjarasamningi sem fjármála- og efnahagsráðherra og viðkomandi stéttarfélag hafa gert.

Ráðið verður í starfið frá 1. september 2025, eða eftir nánara samkomulagi.

Umsóknir skulu innihalda:

• Kynningarbréf

• Ferilskrá

• Afrit af BS og MS prófskírteinum, námskeiðslýsingum og einkunnum (á ensku)

• TOEFL/IELTS eða sambærilegar prófniðurstöður

• Upplýsingar um tvo umsagnaraðila, tengsl þeirra við umsækjanda og hvernig má hafa samband við þá

Öllum umsóknum verður svarað og umsækjendum tilkynnt um ráðstöfun starfsins þegar ákvörðun um ráðningu hefur verið tekin. Umsóknir geta gilt í sex mánuði frá lokum umsóknarfrests.

Við ráðningu í störf í Háskóla Íslands er tekið mið af jafnréttisáætlun skólans.

Vakin er athygli á málstefnu Háskóla Íslands.

Háskóli Íslands er stærsta kennslu-, rannsókna- og vísindastofnun. Háskóli Íslands er gróskumikið þekkingarsamfélag og er fjölbreyttur og lifandi vinnustaður. Akademískt frelsi, fagmennska og jafnrétti eru gildi skólans og er mikið lagt upp úr sveigjanleika og þátttöku starfsmanna í uppbygginu náms og rannsókna við skólann.

Á Verkfræði- og náttúruvísindasviði starfa um 400 manns við rannsóknir og kennslu á sviði verkfræði og náttúruvísinda. Starfsumhverfið er alþjóðlegt enda eykst sífellt hlutfall erlendra starfsmanna og nemenda við sviðið, en fjórðungur bæði starfsmanna og framhaldsnema eru erlendir. Á sviðinu eru um 2000 nemendur, þar af um fjórðungurinn framhaldsnemar. Verkfræði- og náttúruvísindasvið stærir sig af fjölbreytileika og umbótasinnuðu umhverfi þar sem þekkingaröflun og miðlun er í fyrirrúmi.